士多啤梨乳酪雪糕批 (圖文食譜)

BoTan

by 成波之路

夏天咁熱連焗爐都唔願開
做個唔駛焗，凍冰冰，酸酸甜甜既甜品開心下啦


Facebook:        http://www.facebook.com/mywaystogetfat
Instagram:        http://instagram.com/mywaystogetfat
Blog:        http://www.mywaystogetfat.com
Facebook 出post會update，另有其他無出 post 既食譜或關於飲食既小分享
Instagram 出post會update，另有其他唔關事既9up
Blog 可以睇返之前出過post既食譜
有興趣請like/follow/睇睇啦，多謝你既留意同支持#adore#

份量：直徑 18 cm 深 2.5 cm 批一個       
材料
消化餅        6 塊（約90克）
牛油/菜油        25 克
士多啤梨        120 克
蜜糖        80 克
橙酒        1/4 茶匙
希臘乳酪        120 克
淡忌廉        100 毫升
額外士多啤梨（裝飾用）        適量

1. 18 cm（7 吋）批盤塗一層薄薄既油／牛油／nonstick spray，底部墊一張牛油紙


2. 消化餅用食物處理器打碎成沙狀（或可放入膠袋用硬物打碎，小心穿袋），加入溶左既牛油溶液撈勻，如用食物處理器可以加牛油溶液後打兩野攪勻


3. 加左牛油既消化餅碎平均鋪喺批模壓實，用乾淨同乾左既手會比較容易做，壓好之後放入冰箱備用


4. 士多啤梨洗乾淨，印乾，去頭，切大粒放入食物處理器加入蜜糖同酒打成漿之後再加入希臘乳酪打勻


5. 另一個無油無水既容器入面，打起淡忌廉，小心唔好打過龍
（淡忌廉最好打之前先喺雪櫃拎出黎確保佢夠凍，如果用手動打蛋器，因為份量少，用啲窄身既容器會比較容易打起，其實好快就得，無乜需要用電動）


6. 先加大約三份一既士多啤梨乳酪漿落去打起左既淡忌廉度拌勻，之後倒晒淡忌廉撈勻果兜野入剩低既士多啤梨乳酪漿度撈勻


7. 喺冰箱拎返個餅底出黎，溫柔地倒個漿入去，小心唔好沖散個餅底，包好保鮮紙放入冰箱雪到硬身為止，食之前大約十分鐘左右拎出黎攤一陣先脫模同切開，食之前可隨意放上裝飾


- 唔鍾意士多啤梨可以用其他生果，自行調整蜜糖既份量，可以唔好落咁多蜜糖住，撈到最後試味唔夠味先再加蜜糖，試味時要預比想食既甜少少（真係少少）因為啲野雪凍左會淡左啲啲

- 希臘乳酪（Greek Yogurt）同 希臘Style乳酪（Greek Style Yogurt）係有分別既，Greek Style Yogurt 類似 純乳酪 Natural Yogurt 但加左一啲嘢令佢變得質地杰啲似 Greek Yogurt，但實質營養價值最高同最值錢都係希臘乳酪（Greek Yogurt）。Greek Style Yogurt 會平過 Greek Yogurt 少少但貴過Natural Yogurt一截，營養角度上買 Greek Style Yogurt其實好唔抵
（利申：我呢次用果種都係 Greek Style Yogurt黎，因為太平買左好大盒）
（唔想加插咁多英文但有時買呢啲嘢睇英文會清楚好多）
如果問用純乳酪 Natural Yogurt做呢個食譜得唔得其實唔係唔得，但希臘乳酪質地真係幾唔同，雪出黎食落會滑啲

- 雪好拎出黎攤夠佢十分鐘，用把大少少既利刀一下過就會切得好整齊，當然第一步壓個餅底果陣要壓得夠實啦，如果唔係一脫模就會散晒

- 就算唔做批，就咁做個餡是但搵杯仔雪左佢當雪糕食都可以

vpvycehx

非常感激你的文章，不僅思想深刻，而且為我打開了新的思考視角