結婚唔好急於一時

BoTan

Sharon讀書讀到碩士畢業，出嚟做嘢幾年已經廿七、八歲，仲未正式拍過拖。佢自己唔覺得係咩問題，但父母就好似見到香港就嚟陸沉咁心急，一路催佢，一路周圍問人有無好仔介紹。
Sharon開頭唔想理佢哋，但佢越係拒絕，屋企爭拗越多，佢逼於無奈唯有應酬下佢哋。Sharon當時諗，都係見下啫，到時話唔啱咪算囉。
到咗見面果日，女方代表有Sharon、父母、同埋三姨婆，而男方代表就有三十後半嘅李生一個、李生父母同埋李生阿嫲。Sharon陪笑陪到臉抽筋，好辛苦咁食完餐背脊骨落嘅飯，諗住終於塞得住父母把口，點知父母隔幾日就開始催佢︰
「有無send下whatsapp俾個男仔呀？呢個年代女仔要主動啲先得咖！」
「佢事業又穩定，個人又孝順，雖然讀書唔夠你多，但都襯得起你呀！」
Sharon越聽越唔順耳，好嬲父母講到自己嫁唔出咁，嗌咗幾次大交。父母暫時收口，但過一兩個月見Sharon無咩聲氣，又再滲啲滲啲咁舊事重提︰
「不如見多次啦！上次太多人都傾唔到偈！你哋兩個後生嘅自己約出嚟咪會好啲囉。」
Sharon本身孝順女，聽下聽下居然俾父母成功洗腦，見自己眨下眼就嚟廿九，阿媽又講到三十歲好恐怖咁，半推半就又再去見李生。
兩個人本身無乜話題，但傾開大家屋企長輩嘅行為，竟然出奇咁好傾，Sharon對李生大加印象分，後嚟仲真係拍埋拖。雙方父母見有眉目，就更加落足嘴頭，結果兩年唔夠，佢哋真係結婚。
對呢段婚姻最滿意嘅人，當然係果班長輩。
但其實Sharon由拍拖無耐已經覺得李生大自己八、九年，事事睇法唔同個性又唔太夾，兩個人之間無乜火花。佢甚至認為李生唔太鍾意自己，只係年紀大需要搵個女人生仔，又有一個送上門，咁咪一齊囉。
Sharon同娘家傾過，但阿媽話婚都結咗咪亂諗，個個都係咁咖啦，Sharon唯有叫自己咪多心。
結果婚後蜜月期維持咗半年之後，磨擦就越嚟越嚴重。Sharon娘家係咁勸和，但最後拖咗一年都係爆煲，Sharon忍無可忍瞞住娘家辦理離婚，自己搬咗出嚟開始新生活。
離咗婚、離開埋父母，療完傷嘅Sharon突然清醒，佢覺得自己明明仲有好多可能性，點解當初要咁傻同一個唔夾嘅男人一齊呢？
子女太聽話，有時就會催生呢種問題。
Sharon父母驚廿七、八歲嘅女嫁唔出，為佢打點咁多嘢，結果反而令個女有不幸經歷，究竟算係邊個嘅錯？
為自己幸福著想，要識得拒絕其他人插手自己人生。
如果想個女幸福，就應該要緊閉尊口，由佢決定返自己嘅人生步伐，功德無量。

作者: 又曦

wayne12328

唉唉唉唉唉唉

choco

唔結好過結, 好似著衫咁, 要搵件岩身既衫先好著~