必學!如何應付男友嘅屋企人

BoTan

如果另一半嘅家人對你好nice、當你好似自己個女咁，係你幸運，但呢啲嘢有時無得揀。假如咁啱佢屋企人｢好另類｣，都唔使嚇到走人嘅，搵出｢自我求存｣嘅方法就無咁易「出事」㗎喇！





求生術1

唔好話佢屋企人：如果佢啲屋企人做咗啲你唔鍾意嘅嘢，唔好主動提起住，最好等另一半自己先提起，因為佢可能想你理解佢，而唔係批評佢嘅屋企人。




求生術2

微笑與點頭：如果對方係「有佢講無人講」嘅類型，你想表達個人意見可以話係嘥氣，最好保持微笑同點頭，咁樣做唔代表你同意佢，只代表你有聽緊佢講嘢。



又或者，一啲涉及政治同宗教嘅嘢，如果你同佢哋持相反意見，最好都係保持微笑同點頭。都係嗰句，咁樣只代表你有聽緊佢講嘢。



求生術3

保障感情私隱：多事型嘅屋企人傾向習慣擔心同批評，所以唔好同呢類型嘅屋企人講咁多你哋嘅事，例如為乜嘢嗌交，咁樣只會俾位佢哋介入，搞到件事更複雜。





求生術4

小心送禮：如果佢哋較多心，你送太名貴嘅嘢，佢哋可能會覺得你扮晒嘢，送吸塵機、空氣清新機等，佢哋又可能會懷疑你曲線話佢屋企有塵或有陣味。




所以，送禮前最好做下功課，留意下佢哋有無話想要啲乜，總之禮物越｢無立場｣越穩陣。






求生術5

公平公正：如果佢哋平時好鍾意互相比較的話，你就最好對個個家庭成員都一視同仁，唔好話特別同邊個friend啲，如果唔係你可能會成為咗佢哋嗌交嘅話題之一……