男朋友越矮 感情越長久

魏雯青

經常聽到有人話：「男人唔需要好靚仔。」事實上女仔搵男朋友，講真，有幾多真係非靚仔不嫁吖，大家心知肚明，香港邊有咁多靚仔，所以好多時候，最緊要雙方心靈相通，已經可以一齊。不過，男仔唔靚仔，無問題；但係講到矮，真係無計！


有人發帖話唔明白點解朋友有185cm高，但經常夜蒲，又無工返，食煙飲酒，但偏偏有唔少女仔主動接近；相反自己返政府工，月入穩定，而且無不良嗜好，但身高只有165cm，所以由細到大都極無女人緣，極難搵女朋友。有網友認為「搵矮過自己嘅男朋友，等如要男人搵重過自己嘅女朋友。」；又有人話「男朋友唔夠高，出街都會覺得尷尬。」

不過亦有女網友好正面：「男人最緊要有自信，談吐成熟，但又有幽默感就最好，矮都無所謂。」、「都咩世代，男朋友矮過自己無所謂啦。無理由社會可以唔歧視同性戀，反而歧視我哋？」

根據外國約會網站AYI的研究，原來老公矮，離婚機會同時減低，點解呢？

・《Journal of Sexual Medicine》研究顯示，男士矮過5呎9 ，輕於172磅，性能力會更強更持久。
・ 身型矮小的男士自信心反而更強，因為佢哋會盡力去表現自己，唔畀人睇小，表表者莫過於拿破崙。
・女士站在矮小老公身旁，會覺得自己是Supermodel，身心皆呈現最好狀態，心情好，自然爭拗少。
・矮小老公對感情非常專一，通常比較遲婚，但一旦結婚就會非常忠心。