有情慾不代表沒尊嚴
本文章最後由 emiliawyk 於 2018-3-27 23:26 編輯私密情慾照被流出（我嗰d係自願公開/半公開，唔算私密，但屬於copyright），錯嘅係佢背信棄義嘅發放者。呢類背後插刀、陷人於不義嘅小人，直頭係人人得而誅之。諷刺嘅係，喺所謂文明、國際化嘅香港，居然仲有人會為失德者護航，反過來責備被害者淫蕩，因此活該遭到公審謾罵，再不斷攻擊嘲弄受害人。部分香港人封閉愚昧嘅程度，實在配不上「現代化」呢三隻字。
首先，伴侶之間來一點小情趣，互傳誘惑照，就等於淫蕩（負面）嗎？如果有性慾、有情趣就等於「淫蕩」，咁99.9%人類都中槍了。難道男人都希望女伴個個都性冷感、毫無情趣、一條死魚，甚至女性個個都「潔身自愛」，沒有女性願意同你地共赴巫山，你地先稱心滿意？如果只係對愛嘅人激情，何來淫蕩之罪呢？
第二，就算真係淫蕩，又如何？食色性也：好色有理，淫蕩無罪。香港社會對性非常壓抑保守，甚至可以話半個世紀以來毫無寸進。世人彷彿唔發現，如果人唔淫蕩，我地早已絕種了。男人鹹濕，社會雖然都會偽善地、零星地責備，但尚且會視之為正常嘅事。而男人，好多時都會幫返男人，「男人嘅嘢，明白嘅」。但女人呢？女人一但展露出性感、情慾嘅一面，就好容易受盡男男女女千夫所指。一旦一個「淫婦」被攻擊，身為女性嘅，好多並唔會幫返女性，反而係急不及待落井下石，以凸顯自己嘅貞操，向嗰d偽善嘅男性表忠。呢種女性加諸於女性嘅厭女、獵巫文化，幾時先可以休止呢？ 到底女性幾時先可以明白，別人嘅（所謂）墮落並不代表自己嘅清高？
第三，女性嘅身體就只係一副軀殼，如何展現，並不能斷定佢嘅尊嚴或人格。喺香港，女性嘅身體總係比男性更矚目，甚至更具優勢，而同時亦相對地更被規範。好多人會認為，假如一個女性嘅身體同情慾被公諸於世，佢一輩子就玩完了（而男性則幾乎完全無呢類嘅壓迫）。因為女性嘅身體同情慾應當如此內斂和「珍貴」，所以「蕩婦」係無恥嘅、女性一觸及性就假定會係受害人、裸照被公開就係摧毀性嘅。但社會是時候向前了，男女都好，一個人嘅尊嚴不應該以其貞節來衡量。佢嘅價值觀、品格、才華、性格、學養等，先係睇到一個人嘅光芒之處。一個對人呼呼喝喝、心地差嘅處子，絕對不比一個善良嘅「淫娃」高尚。
上述第三點，亦都係不少倡議「身體自主」嘅人士，包括我自己，喺網絡上/遊行時剝衫剝褲嘅原因。我地想透過反覆嘅論述，游説各位觀眾，「即使一個人全裸出現喺你面前，你都沒有不尊重佢嘅理由」。要做到咁「極端」，係因為現實生活中，不少膚淺自大嘅人，一看到別人穿背心熱褲、貼身T-恤，就立刻先入為主認為如此打扮就不值得尊重，繼而合理化自己侵害他人自主嘅行為，例如性騷擾、性侵犯、惡意中傷誹謗等。
當然，我地唔係聖人，亦只係業餘付出自己嘅心力去盡做，做得唔好、不足、讓人誤會都在所難免。但願我地一人做多一步，讓呢個世界多d「淫娃蕩婦」，同時慢慢學懂尊重別人嘅生活方式、唔好膚淺武斷地論斷別人吧。
我也是過來人，我想認識你，留contact嗎
頁:
[1]