教你如何應付討厭的同事
打工呢回事，又點會個個同事都係人見人愛咁美滿吖？！其中有啲你可能日日心裏面咒罵佢哋添，與其浪費時間去咒佢，不如諗下計令自己舒服啲好過啦！
1. 解決問題：你幾唔鍾意佢，都無可避免地要同佢一齊開會、做嘢，你唯一應該做嘅係將焦點放喺解決件事嘅問題上，而唔好將任何energy放喺嗰個人身上，或者你當佢係工作入面其中一件物體好了。
2. 同啱傾人hangout：嗱，一個人單打獨鬥係好攰嘅，人人嘅情緒都需要支援，咁唔係叫你聯群結黨去攻擊佢，而係多啲同mind set接近嘅人一齊，個人情緒就已經可以紓緩唔少架喇。
3. 計算個人能力：喺同任何人交手時，先唔好諗人哋，而係諗自己先，例如自己嘅強項/弱項、喺呢一刻有咩優勢、可以做到/做唔到啲乜。
然後你可以依據上述資料去同人傾嘢，咁就唔會俾人牽住走，唔會因為大意而應承咗啲自己做唔嚟或唔應該做嘅嘢。
4. 放開啲：只將力量放喺你做到、控制到嘅事上，控制唔到嗰啲，諗嚟都無用，plan B/C可以諗，但唔使諗到plan N嘅話，都係嗰句，只係plan自己能力範圍做到嘅嘢。
5. 注意情緒轉變：有啲人好鍾意攻擊別人情緒最弱嗰部分，即係重複做一啲嘢想激到你爆為止，所以面對討厭精時，要時刻注意自己嘅情緒變化。
當你唔知點做時，不妨俾啲時間俾自己整理思緒，笑而不語會係一個唔錯嘅方法，如果有人迫你表態，就話要諗諗、研究下先。
6. 設定界線：要明白自己唔會亦唔能夠滿足所有人，接受其他人同自己係唔同嘅。
既然道不同，大家都唔使太close，但唔係叫你黑起塊面對佢，要保持應有嘅禮貌，同應有待人接物嘅態度，講下笑無傷大雅，但唔使交心。
7. 保持正面：將精神集中喺令自己滿足、開心嘅事情上，世上只有正能量可以夠抗衡惡勢力！
8. 瞓好啲：唔係講笑，瞓得唔好會影響個人戰鬥力、情緒、抗壓力、集中力。如果你聽日一早要同討厭精開會，今晚就更加要食好啲、瞓好啲！
頁:
[1]