[香港] 香港娛樂圈十大賤男

最近吳忠義被爆原來5年前已背妻司馬燕搞內地小三Summer，仲被指已簽承諾書必娶Summer，事件鬧到滿城風雨！雖然吳生曾發聲明否認，但老婆屍骨未寒就傳出呢啲醜事，真該煨！其實以往都有唔少劈腿，甚至棄糟糠嘅賤男，同樣令人咬牙切齒！

自認係人渣嘅世紀賤男周永恒(Roy)與趙頌茹(Yu)結婚不過4年，育有2個女兒，但去年突爆婚外情，事緣阿Yu揭發人渣偷食，小三正是Roy模特兒公司拍檔、港視小花劉依靜(Ruby)，同時人渣Roy家暴阿Yu，期後人渣Roy話想同阿Yu復合，但轉個頭又反口話要離婚同爭撫養權；更登阿Yu娘家家門，吐口水用粗口辱罵外父外母，並以WhatsApp恐嚇殺死妻女及自殺，涉嫌刑事恐嚇被拘捕，最後法庭裁定普通襲擊罪成，大快人心！近日周永恒又晒新女，真係睇下好得幾耐。

去年5月，彭順背住李心潔於圓方同26歲o靚模李悅彤(Liddy) 密會，期間兩人肆無忌憚當眾拖手、啜嘴、搣胸、搭膊、攬腰乜都做齊，偷食斷正，彭順被網民鬧爆兼狂插係賤男。醜事曝光後，彭順即飛往馬來西亞箍煲，有傳心潔得悉事件後傷心痛哭，最後彭順與心潔就事件一起作出回應，而心潔最終選擇原諒老公，心潔咁大量，實在難得！

滕麗名同冇品魏駿傑甩拖後，於2008年被爆與郭政鴻拍《桌球天王》演情侶，啜出真愛。阿滕以為搵到個好男人，兩人發展迅速，成為公認一對，但原來男方一直呃住阿滕結咗婚重生埋女，阿滕又被蒙在鼓裏，自己做咗小三都唔知！直到2010年9月被傳媒影到，阿滕先知又愛錯人，雖然對外界仍然保持「好朋友」關係，但感情已大不如前。

03年男方轉投寰宇，北上大陸發展，夫婦聚少離多，感情進一步轉淡，撈家決定分居，並在08年初辦理離婚手續，正式結束28年情。有傳當年離婚係因第三者介入，撈家雖然否認，但相隔半年，撈家就宣布跟內地演員蘇岩將於9月結婚後誕下女兒，佢覓得第二春就開心，但有報道指前妻生活為供樓同養仔，一份炒蛋多士分開兩餐食，慳得就慳。

李丞責於2007年迎娶前妻譚佩麗，兩人相戀十三年結婚，前妻譚佩麗原為李丞責財政大臣兼私人秘書，可惜婚姻只維持4年，有傳李於2010年與港姐冠軍劉倩婷合作《香港玄案》撻着！

2011年8月，李丞責被影到同劉倩婷車接劉媽媽，一度負上棄糟糠嘅罪名，為洗清嫌疑，李丞責自爆同前妻譚佩麗已辦妥離婚手續，又表示結婚前已批算自己會經歷婚姻離異，至2013年2月，李和劉拉埋天窗。而李嘅前妻就分得過億身家。

2011年被本刊爆於橫店拍劇時藉醉狼吻陳嘉桓，又對佢上下其手，搞到要攜即將臨盆嘅太太蔣麗莎開記招，聲淚俱下向陳嘉桓道歉！在眾目睽睽之下，陳浩民硬拖着大肚妻子蔣麗莎上演大龍鳳不特止，短短7分鐘記者會中，浩民一哭二鬧三鞠躬四道歉，臨走時還作狀發軟蹄，要大肚妻攙扶，結果扮死狗失敗，更被網民罵個體無完膚！

事過境遷，蔣麗莎好好生養，為陳浩民先後誕下兩女一子，現正陀住第四胎，希望陳浩民真心悔改做個好老公好爸爸！

08年底，倪震被本刊拍得背住女友周慧敏到蘭桂坊夜店尋歡，偷啜22歲城大女生張茆，當大家以為倪震夜場激咀斷正，玉女周慧敏睇清楚男友真性情後會覺悟啦！點知事後竟獲周慧敏原諒，更戲劇性地結婚！

司馬燕老公吳忠義(Togi)早前被爆5年前已搭上內地小三Summer Sun(孫君子)，司馬燕當時得悉姦情後，大受打擊屈出癌症！在老婆抗癌期間，Togi背妻跟Summer藕斷絲連，甚至趁老婆留院時，經常飛去北京會小三，令司馬燕身心受盡折磨，認真唔要得！
至近日事情峰迴路轉，Togi發聲明認曾同小三Summer拍拖，但已於今年9月分手喎，點都好啦，老婆屍骨未寒就搞三搞四唔要得！

全篇完

來源網址：www.facebook.com/orientalsundayhk